Frétt
Styrkur koldíoxíðs (CO2) í andrúmslofti Miðlífsaldar (fyrir 251-65 milljón árum), sem er með heitari tímabilum í sögu jarðar, og í upphafi Nýlífsaldar (fyrir sirka 55 milljónum ára) gæti hafa verið mun minna en áður var talið – en greining á styrk þess er erfið og óvissa mikil. Ný greining á jarðvegi bendir til þess að styrkur koldíoxíðs, í andrúmslofti þessara tímabila, gæti hafa verið svipaður og spáð er að geti orðið í lok þessarar aldar.
Á myndinni hér fyrir neðan er sýnt hvernig talið er að magn CO2 hafi verið, en ég hef ekki komist yfir mynd úr greininni sem hér er fjallað um.
Hér má sjá nokkrar mismunandi rannsóknir á magni CO2, aftur til loka Kambríum. Eins og sést eykst óvissan mikið með aldri. Mynd af wikipedia.
Greindur var jarðvegur (frá nútíma) í Bandaríkjunum og reynt að ákvarða skilyrði þau sem þurfa að vera til staðar til að mynda steindina kalsít – en það er að hluta til myndað úr koldíoxíði og hefur þessi steind verið notað til að áætla styrk þess í andrúmsloftinu.
Við rannsóknina kom í ljós að kalsít myndast í jarðvegi einungis á heitasta og þurrasta tíma ársins – en ekki allt árið í kring. Með þessar upplýsingar í farteskinu endurreiknuðu höfundar styrk koldíoxíðs í andrúmsloftinu síðastliðin 400 milljón ár. Sumar fyrri rannsóknir hafa bent til styrks upp á 3-4000 ppm – en þessi rannsókn bendir til þess að styrkur þess hafi verið mest um 1000 ppm.
Ef rétt reynist (það má búast við mótbárum frá öðrum sem rannsaka styrk CO2 á fyrri jarðsögutímabilum), þá má búast við að hitabreytingar geti orðið hraðari en spár gefa til kynna, þ.e. ef gróðurhúsaáhrifin munu hegða sér líkt og á fyrri tímabilum jarðsögunnar.
Heimildir og ítarefni
Greinina má finna hér (áskrift): Breecker o.fl 2010 – Atmospheric CO2 concentrations during ancient greenhouse climates were similar to those predicted for A.D. 2100
Hér á loftslag.is má finna umfjöllun um orsakir fyrri loftslagsbreytinga.
Ég mæli einnig með lestri annarrar greinar, þó hún taki ekki fyrir Miðlífsöld – en fókusinn er á hlut CO2 í loftslagi Nýlífsaldar (síðastliðin 65 milljón ár): Hansen o.fl 2008 – Target Atmospheric CO2: Where Should Humanity Aim?
Einnig er hérna skemmtilegur fyrirlestur sem fjallar um jarðsöguna og áhrif CO2 á hitastig hennar: The biggest control knob
sending...
Þetta gæti alveg eins bent til þess að það séu einhverjir aðrir þættir en styrkur ( “hlutfallslegt magn” , kannski betri lýsingarhugtak ?) koldíoxíðs í andrúmsloftinu sem drífa hitabreytingarnar, a.m.k ef ég geri ráð fyrir að fyrri útskýringar á ástæðu mikilla hlýinda á þessum tíma hafi verið að þær væru tilkomnar vegna mikils styrks koldíoxíðs.
Ef hann var miku minni en álitið var verður spurningin sem á að spyrja fyrst “hvers vegna var þá samt svona hlýtt?”.
Eitt svarið gæti auðvita verið að koldíoxiðið er svo miklu ðflugra GH-gas en við erum að gera ráð fyrir, en það er alls ekki gefin niðurstaða.
Ég tek fram að ég hef ekki skoðað greinina , bara að benda á að það eru aðrir möguleikar í boði
Það eru margt sem er á huldu varðandi loftslag Miðlífsaldar og alls ekki víst að þessar tölur varðandi styrk CO2 í andrúmsloftinu séu réttar – þetta eru allt saman óbeinar mælingar.
Ef þetta er rétt, þá er samt líklegasta ástæðan fyrir hitastiginu á Miðlífsöld sú að áhrif CO2 séu meiri en talið var. Lega meginlandanna gæti haft eitthvað að segja, en jörðin leit allt öðru vísi út á þessum tíma. En það er vissulega ekki hægt að útiloka aðra þætti.
Eitt er víst – menn telja sig vita að sólvirkni hafi verið minni á þessum tíma en nú.